لان الصورة بالف كلمة ( عن العسكر و الوساخة والعلاقة الحميمة بينهما )

لان الصورة بالف كلمة ولان اصلا مافيش كلام يتقال - غير بعض الالفاظ التى يعتبرها البعض بذيئة و قمة فى القباحة - فالبوست ده هيكون عبارة عن شوية صور لاحداث مجلس الوزراء وعن انتهاكات العسكر لاسيادهم

مش مهم الكلام لانها ب 1000 كلمة

امتى ؟؟؟

امتى كانت اخر مرة ضحكت فيها ؟؟؟
ضحكت فيها من قلبك مش علشان تجامل حد بضحكة مصطنعة ؟؟؟
امتى اخر مرة ضحكت فيها من جوة مش ببقك بس ؟؟
امتى اخر مرة فرحت فيها 
اخر مرة دخنت فيها سجائر بفرحة مش بهم يخرج مع دخانك ؟؟
امتى اخر مرة بصيت للدنيا بعينك الحلوة ؟؟
امتى اخر مرة لفيت فى الشوارع وابتسمت ؟
امتى اخر مرة سهرت طبقت وما نمتش وانت بتشرب قهوتك فى صحة السعادة ؟؟
امتى كانت اخر مرة فيها صحيت من نومك الصبح بدرى وانت مبتسم وبتقول صباح الفل يا دنيا .... بقالك كتير بتصحى من نومك بتقول وادى يوم تانى هنعيشه ..
امتى امتى امتى كانت اخر مرة قعدت فيها ع القهوة مع اصحابك بتضحكوا بصوت عالى وانتم تلعنون سيرة الشغل والفلوس وتتحدثون فقط فى امور هزلية تثير ضحككم ؟؟ 
امتى امتى امتى كانت اخر مرة حسيت فيها انك عايش فعلا ؟؟
هه جاوب ... ما ترد عليا
      ولا اقولك خد سيجارة واشرب القهوة وانت ساكت علشان انا عندى صداع

عندما نعبد أبو اسماعيل

تابعت – مثل الكثيرين – حلقة الشيخ حازم صلاح أبو اسماعيل فى برنامج ليطمأن قلبى والذى أذيع على قناة التحرير وقبل ان اشاهد حلقة البرنامج كنت أسير فى شوارع مدينتى طنطا واستوقفنى كمية الملصقات الكبيرة لحملة ترشح الشيخ حازم لمنصب رئاسة الجمهورية ......

بعدها كان على ان ابدا فعلا فى التعامل مع الشيخ حازم صلاح كمرشح اسلامى محتمل لرئاسة الجمهورية

وعلى ان أبدأ افكر فى كلامه ليس كداعية قنوات فضائية دينية بل افكر فى كلامه كتصريحات لاحد مرشحى الرئاسة هذه التصريحات التى تمثل جانبا من تفكيره ومن ثم جانب من برنامجه الانتخابى (الذى سيطبق لو تقلد هذا المنصب )

وعليه فان النظرة الى حوار الدكتور حازم اختلفت من مجرد اراء او قل فتاوى الى اراء من المفترض انها تخرج من سياسى يمكن ان يتقلد مقاليد الامور فى بلدنا العزيزة.....

تابعت وجهة نظر السيد الدكتور فى وجوب فرض الحجاب على السيدات فى المجتمع وتابعت تصريحه بان " الحاكم من دوره ان يفعل هذه الفرائض "

وقد اعلنها الدكتور حازم واضحة صريحه انه سيطبق الشريعة الاسلامية ...

ولكن اسمحلى يا دكتور من ذا الذى سيطبق الشريعة و من اى منطلق ووجهة نظر دينية ستطبق ؟؟؟

هل ستطبق من وجهة نظر حضرتك ؟؟؟

هل ساسمع يوما بيانا يتلى على بأن :-

" القائد المرشد الامام هو اعدل واعلم واتقى رجل فى الامة يدير شئون البلاد والعباد بالخير الى الابد "

ثم انه من حقى يا سيدى ان اتسائل عن الجهة المنوط بها تنفيذ هذا الامر الذى هو تطبيق شرع الله

هل ستكون مهمة الشرطة ؟؟؟

أم هيئة الامر بالمعروف والنهى عن المنكر كما الحال فى المملكة الرشيدة اقصد مملكة ال سعود

هل سيكون هناك هيئة للامر بالمعروف والنهى عن المنكر تحملنى على أداء الواجبات الشرعية ؟؟؟؟

سيدى الدكتور المرشح لرئاسة جمهورية بلدى اذا كنت ستفرض الحجاب وتلزم النساء بارتدائه – وهو عندى ليس باهم الاشياء حتى وان كنت تراه ضرورة قصوى وامن مجتمعى – فهل لى ان انم مستريحا وانا مطمئن اننى اذا عارضتك لن تتهمنى بالكفر والزندقة ومعارضة شرع الله ؟؟

سيدى الفاضل أنا اعرف الحرية واحترمها واحترم حقك فى عرض وجهة نظرك وافكارك واحترم وجودك

لكن قل لى هل اذا وصلت للحكم ستسمح لى بالمعارضة

هل ستسمح لى بمعارضتك وانت الذى تطبق شرع الله ؟؟

هل سيسمح لى ان اعارض نظامك ؟؟؟

هل ستسمح لى بقرار اتخدته مثل قرار فرض الحجاب على النساء

هل ستسمح لى بالوقف متظاهرا مدافعا عن حرية من لا تريد ان ترتدى الحجاب

ام ستعتبرنى معرقل لتطبيق شريعة الله فى ارضه ؟؟

ثم ماذا عن الصلاة ؟؟

وقد ذكرت فى حديث لك من ذى قبل حديث شريف عن الرسول نصه

" والذى نفسى بيده لقد هممت ان أمر بحطب فيحتطب ثم أمر رجلا فيؤم الناس ثم اخالفه الى الرجال فأحرق عليهم بيوتهم "

                                             فقه السنة – المجلد الاول

حضرة المرشح لمنصب رئاسة الجمهورية

هل ستحرق بيتى لانى لا اصلى فى المسجد ؟؟

قل لى ماذا ستفعل مع من لا يصلى ؟.... من يجلس على المقهى وقت الصلاة

هل ستكون هناك اصلا مقاهى نجلس عليها ؟؟؟

قل لى : هل لنا ان ندخن ؟؟؟

هل ستبقى على المقاهى والنوادى والسينمات ؟؟

هل ستعرض افلام فى هذه السينمات ؟؟

وما هى نوعية هذه الافلام ؟؟ ربما لا تعلم فانى اتعلم كتابة السيناريو و الاخراج وانا احضر لافلام قد يكون بها ما لا يعجبكم

قل لى ايها الشيخ الفضيل المرشح للرئاسة

ماذا ستفعل مع الاقليات ؟؟

ربما لا تعلم ان هذه النقطة تقلقنى حبتيتن

ماذا ستفعل معهم وارجوك اجبنى بعيدا عن كلام الانشاء من عينه حقوق اهل الكتاب فى الاسلام ... و صون الذميين فى الاسلاميين وحقوق النصارى فى دولة الاسلام ..............الخ

أجب على فى ضوء الدولة الحديثة .. دولة المواطنة التى لا تفرق بين مواطنيها وحاملى جنسيتها على اساس دينى

   ام انك سوف تفرق ؟؟؟

دعنا من المسيحيين ماذا عن الذين هم ليسوا اهل كتاب فى معتقدك الدينى ؟؟

ماذا عن من تركوا الاسلام ؟؟؟ ماذا ستفعل معهم ؟؟

قل لى سيادة المرشح

ماذا ستفعل بالجامعات ؟؟ هل ستتركها كما هى مختلطة أم انك ستتبنى نظرية استاذك ومعلمك العلامة ابى اسحق الحوينى الذى حكم على طلبة الجامعات بانهن اثمات ؟؟ هل ستكفى بناتنا شر الاثم وتفصلهن فى جامعات بمعزل عن الاولاد ؟؟

ام انك ستقعدهن فى بيوتهن ونريح دماغنا ؟؟؟

فضيلة الشيخ – المرشح لرئاسة الجمهورية – من حقى ان اتسائل انا وغيرى عما تنوى فعله كى اكون على علم

من حقى ان اعرف كيف سيكون مستقبلى ومستقبل اولادى اذا حكمت هذا البلد

سيدى الدكتور

انا لست ضد الحجاب ولست ضد الفرائض الدينية مهما كانت انا فقط ضد الاجبار ضد الاجبار الواقع على بشر من بشر مثله ( مش اله يعنى )

يا سادة

لو بقينا  بنصلى علشان  ابو اسماعيل

ونصوم رمضان علشان شرطة ابو اسماعيل

وتخاف النساء من مخالفة امر الحاكم ابى اسماعيل فترتدى الحجاب

يبقى احنا بنعبد ابو اسماعيل .......

لا تسألنى ان كان القران

مخلوقا أو ازلى

بل سلنى ان كان السلطان

لصا ... أو نصف نبى

أمل دنقل

اللعب فى الدماغ

عايز تتحكم فى شوية بنى ادمين - سياسيا او دينيا - عايز تلعب فى دماغهم وتمشيهم زى ما انت عايز وما يفتحوش بقهم غير امتداحا و تسبيحا لك ....
اليك االطريقة الفعالة .... 
املى دماغ شوية البنى ادمين دول ان كل العالم عليهم..... كل العالم يكرههم يدبر لهم المكائد العالم باسره هو سبب ما يعانوه من اى حاجة ومن كل حاجة 
حتى ان معجون الاسنان ما فيش منه بالفراولة 
ده بسبب العالم ابن الكلب اللى بيكرهنا وبيحمل لنا كل البغض 
اذا كنت هتتكلم معاهم عن الدين املى دماغهم ان دينهم هو الحق تماما وكل العالم عارف انه الحق وعلشان كده بيحاربوه 
قولهم ان العالم كله متحالف الان ضد هذا الدين 
(هذه الطريقة صالحة مع كل الاديان اللى فى الدنيا حتى دين عبادة القطط كله شغال )
ولو كنت هتتكلم معاه سياسيا استخدم نفس الطريقة برضه مع تغيير طفيف للمصطلحات املى دماغهم ان بلدهم هى احسن بلد فى الدنيا و بلدهم دى عليها العين من ناس كتير....
ناس كتير عايزة خيراتها 
كل العالم الان يجلس فى اوضة ضلمة يتامر علينا 
ولاد ميتين الكلب قاعدين بيقسموا بلدنا وكل واحد بيحدد نصيبه من دلوقتى 
العالم كله حاطط عينه علينا ويده بتلعب فى بلدنا وانه لولاك لعاثت هذه الايادى والارجل والاطراف فى بلدنا فسادا وللعبت فى بلدنا اكس اوه...
املى عقولهم بنظرية المؤامرة 
المؤامرة على الدين .... والدين يكافح بمعاونة رب الارباب و انت تحمل المسئولية فى حمايته من الضياع
المؤامرة على البلاد .... وانت تعرف الاعيب المعتدين وستوقفهم عند حدهم ولمزيد من الاثارة قل :-
سادخل الى عقر دارهم واجيب ولاد ميتين الكلب دول من قفاهم واطلع دين ابوهم
ثق تماما انه بعد تنفيذ هذه المهمة سيصبح البنى ادمين فى يدك اطرى من الصلصال و سيمدحونك ويسبحون لك ليل نهار
واعدك ان من بينهم من سيرفعك لدرجة الانبياء وسيقولون عنك انك ظل الاله على الارض وحامى الدين والعرض 
ولن يبقى احدا ليقول لك انه او اراد لنا العالم هذه الشرور كلها لما استطاعوا دون معونة منا 
نعاونهم بتخاذلنا و كسلنا 
لن يبقى احدا لديه شك فى كلامك ليقول لك 
لو العالم مركز اوى معانا كده ومشغول بينا للدرجة دى ماكنوش وصلوا للى وصلوا له واحنا فى تراجع مستمر
صدقنى صدقنى لن يبقى احد ليعترضك
بل سيخرون مقبلين يديك متوسلين ان تحيطهم بعنايتك وعلمك 
صدقنى .....
        صدقنى............

البيان 71 وغزوة غرة رمضان

اعترف اننى فعلا فقدت الاهتمام ببيانات المجلس العسكرى من فترة فقد مللت تلك الكلمات التى ( لا تودى ولا تجيب ) والتى اما ان تتكرر واما ان نجد انها تناقض نفسها 
بالامس هل علينا البيان 71 من سيادة المجلس العسكرى وهو بصراحة بيان غريب وعجيب 
المجلس بيهنى الشعب المصرى برمضان والمسيحيين بصيام العدرا 
ده على اساس ان المسيحيين دول شعب تانى غير شعب مصر العظيم 
لا وشوف الصيغة 
كما يسعدنا ان نتقدم بارق التهانى الى الاخوة المسيحيين .... الخ 
كما يسعدكم ماشى يا سيدى 
طبعا ده كله غير ان صوم العدرا يوم 7 اغسطس يعنى ده ع حسب علمى والظاهر ان المجلس قال ادخل ده فى ده وابقى خلصت من المعايدة ع الاتنين وخلاص ...
كل ده حمادة واللى عمله المجلس النهاردة من فض الاعتصام بالقوة حمادة تانى.
المجلس المحترم الجميل اللى حمى الثورة وولاده الثوار فض الاعتصام النهاردة بالقوة يا نهار اسود فى نهار اول يوم رمضان يعنى انت امبارح لسه مهنى الناس برمضان وبيس وتمام والنهاردة تعجن فى الناس وتطلع ايمانهم لا وتحبس التاس جوا الجامع وبعدين تكسر الباب وتضربهم 
ده ايه الجبروت ده .... وكان المجلس العسكرى يقوم بغزوة غرة رمضان فى التحرير وده على غرار غزوة الجمعة اللى فاتت .
الغريب انى فعلا ملاحظ تعاطف من البعض مع المجلس العسكرى ودعم هايل يعنى ففى تعليق ع الخبر فى جريدة الفجر قال احد القراء 
" لازم يتطهر الميدان الوسخ ده اللى ظهر ان فيه ناس مش محترمة 
لازم فض هؤلاء العاطلين اضربوهم بالجزم اضربوهم حتى نتطهر من الميدان القذر ده "
ولكم التعليف

صور من الميدان اثناء فض الاعتصام بالقوة.

عوارة

عوارة ده اسم اكتر جامع بيمثلى ذكرى سيئة 
باختصار عوارة فى طنطا يعنى موت 
عوارة ده الجامع اللى جنب المقابر الكبيرة فى طنطا واللى فيها مقابر عيلتنا واللى مدفون فيها ناس كتير عرفت منهم ناس فى حياتى وفى ناس عرفتهم بالحكاوى عنهم بس 
دايما اسم عوارة لما كان يتنطق قدامى اعرف ان فيه حد مات وهيتصلى عليه فى الجامع ده وبعدين يتدفن 
يدور فى دماغى شريط الذكريات للناس اللى ماتت واللى اتصلى عليها فى عوارة و الناس المرشحة انها تموت ( اقربهم الى الموت ) واقعد  افكر يا ترى مين ؟؟؟؟ من اللى عليه الدور المرة دى من اللى هيتصلى عليه فى عوارة 
النهاردة الصبح كنت فى البرزخ ( منطقة اللاوعى واللا ادراك بين النوم واليقظة ) سمعت الوالد فى الاوضة اللى جنبى بيتكلم فى التليفون وهو بيقول عوارة ماشى ان شاء الله طيب 
قفل السكة وقعد يقول  لا حول ولا قوة الا بالله فعرفت ان النهاردة فيها زيارة لعوارة وان فيه حد هيوارى الثرى النهاردة 
وعرفت انه واحد من عيلتنا وهو كان شاب فى منتصف الثلاثينيات 
كنت اعرفه معرفه سطحية كقطاع كبير من عيلتى و الذى التقى به فقط فى المناسبات الاجتماعية .
النهاردة كمان عرفت نبا وفاة 3 من معارفى ناس كنت اعرفهم اشتغلت معاهم فترة ما عرفتهمش كتير ولا عرفونى اوى  بس يعنى اتقابلنا مرة او مرتين 
ماتوا فى حادثة عربية والنهاردة هيتدفنوا بس فى القاهرة واكيد مش هيتصلى عليهم فى عوارة 
وكمان النهاردة وفى نطاق الحى الصغير الذى اسكن فيه الجوامع نادت على اربعة من الناس ماتوا النهاردة 
3 رجال وسيدة وهيتصلى عليهم فى جوامع مختلفة ولن يصلى عليهم فى عوارة 
من اول اليوم والموت بيصطاد فى الناس انا لوحدى اعرف 4 من اللى ماتوا و 4 فى محيط سكنى ما اعرفهمش بس عرفت انهم ماتوا النهاردة طيب يبقى مات قد ايه النهاردة فى بر مصر ؟؟ طيب فى العالم كله ؟؟؟
مش عارف 
كل اللى اعرفه ان الموت ما بيخدش اجازة وهو من اكتر المتقنين لعمله بيعمله بزمة يعنى 
عرفت انه مات النهاردة 8 اتصلى عليهم فى جوامع مختلفة ولكن جوامع الموت بالنسبة لى كلها عوارة 
من اول اليوم كانت جملة "رائحة الموت تملئ الجو " هو الاقوى تعبيرا عن الوضع الان 
ان رائحته فعلا  تملئ الاجواء وتجعلنا نسال من التالى من التالى ونعصر دماغنا فى تذكر المرشحين لان يزوروا عوارة .