حالات

حياتى حالات
حاله فرح وساعات حزن
واحيانا حاله تفاؤل تمر
ترمى السلام وتقول حبه كلام
حاله تشاؤم واكتئاب
كانت لابسه تنوره
كانت من كلامها باين انها مغرورة
حاله حب روحها مكسورة
عايش بيها حياتى
حاله صفا مع نفسى
دايمه لوقت مش كتير
لذلك اؤمن بان حياتى حاله كبيرة بعيشها بكل تفاصيلها

2009

لحظات معادة

 طالعة على سلم المدرج
  بتتمايل بدلع
  ضحكت فالدنيا قالت يا سكات
  صغيرة يمكن
  بس الرومانسية فيها متأصلة
  مين اللى قال ان الحب بالمقاسات
  دكتور بيزعق
  و طالب نايم
  و واحد بيحاول يحافظ على عقله فى حالة ثبات
  و واحد فى بحر الشوق عايم
  و واحد غرقان لشوشته فى الحسابات
  و تصفير وزمامير
  و صوت شبه صوت الحمير
  كل دى لحظات -فى المدرج-عادية
  بل كمان ممكن تكون معادة
  بس انا نفسى اعرف
  ليه الحزن بقى صاحب طريقنا
  و الدكاترة بيكرهوا لينا السعادة
  طنطا
  يوم امتحان المحاسبة
14  يناير 2010

فيلسوف سكر

يوم الخميس بالليل
فى البر اياه
ايوة اللى فى ارض النخيل
كاس ورا كاس
اسكر واميل
وبعد5 كاس
ابقى عليل
وافوق على ثولة
اصحى يا سكير
لا انا مش سكران
بالعكس
ده انا فيقان
وقلبى مليان احزان
من حببيتى اللى سايبانى
اللى سابتنى فى عز الازمة
وراحت معاها ايام اللمة
اهلا بيكم فى كراكيب
كوكبى الصغير الحبيب
كوكب المتوحد ابو
17 عام
انا مين؟
وانتى مين؟
انا وانتى روحين سوا
دابوا
زى قطرة فودكا مع 3 نبيذ
اختلطوا فى كاس
ساعة لما شربتهم
اه من ده احساس
احساس بانى طاير
فوق بحر خماير
وشايف حبيبى شايل
احلامى وماشى
بيستعد للرحيل
وانا لسة فايق من سكرى اللى دام كتير

2
اه من الليل
ساعة لما يدهن السما سواد
والله احساس غريب
يستحق الوقوف
ساعة ما تصحى
تلاقيك مقروف
زى اللى على كاس ملهوف
ولع سيجارة
ما فيش ولاعة
ولا كبريت
ولعها من قلبى المحروق بنار الفراق
وحبال الهوى المتقطعة
وكسر الاشواق
ليه كل وردة فيها شوك
بتنغرس فى ايد اللى يطبطب
ليه انا ماشى
ومش عارف رايح فين
هو انا مين؟
افتح يا صاحبى يا امين
مين؟
مش عارف
طب مش فاتح
خلاص هقول
انا واحد كنت ماشى
لاقيت حبيب
وقلب جديد
فرحت واتنططت
وبعد ما عشت
لاقيته قديم
ومعمول له اعادة تاهيل
زى حكاوى الزمن المعادة
وجراح قلبى العليل
احمد
طنطا

يونيو 2009

أحيانا

احيانا

الطفل اللى جوايا بيصحى 

ويقول لى انا موجود

اسمع صوته بيهمس لى 

للجد وللبيزنس حدود

أمسك ورقى واقلامى 

ارسم 

واشخبط بالالوان

اطلع من صورة دنيا 

متلونة بلون بهتان

ارسم واشخبط ع الجدران

  وفى كل مكان 

 اغنى وصوت غنايا 

يسمع الناس فى كل الوديان

ارسم بلياتشو حزين 

وشه متلون بدهان 

او حتى واحد زهقان

ارسم فى السما طايرة 

عصفورة 

وبنت بتجرى والهوا يرفع التنورة

واغنى للعنكبوت النونو

وأعد على صوابعى من تانى 

ويسألونى 

القلم ده ايه لونه؟؟

ارسم ولد صغير 

فى ايده ماسك بلونة 

وعلى خده بوسة حنونة 

ارسم بنت بتجرى هنا وهناك

قتل البراءة للانسانية انتهاك

وافوق وافتكر انى كبرت 

وشبر ونص لفوق طولت 

وبقيت راجل كبير 

وللجد والبيزنس اسير 

اكتوبر 2010

انشر هذه الابيات احتفالا بانى لقيت اجنده من سنة 2000 كنت بكتب فيها يومياتى وبرسم فيها 

كنت عيل عندى 8 سنين وبرسم اى صور واكتب اى كلام 

عشر سنين عدوا 

ولسه

يبنى نصبه التذكارى

يبنى نصبه التذكارى
بأحجار لونها
احمر نارى
استعدادا للرحيل
كى يتبقى له
ما هو اكثر من
العويل
يأمل ذكر اسمه
بعد الموت
عند السكوت
هذا صرحه المشوه
بخطايا الزمان
وهذا قلبه المخضب
بمعانى الحنان
هنا كان يعيش
وهنا تأمل
وهنا امام مرأته
كان يتجمل
هذه صورته
وهذا كتابه
تركه ليكون عبرة للعابرين
لمن هم فى عمر شبابه
عاش قليل
وتعلم اكثر
حياتهم طوال
وحياته اقصر
هذا انا
وهذا نصبى التذكارى
احمد
طنطا فى 13 مايو 2009

هى الساعة كام ؟؟؟

هى الساعة كام؟
مش عارف
بصيت للساعة
ياه دا انا اتاخرت
شديت الهدوم من ع الشماعة
بنطلون وحزام وتى شيرت
وادى كمان سيجارة لزوم الاصطباحة
فين الولاعة
اهى
ادينى ولعتها
بولاعة فضة
عليها حروف اسمى بالذهب
جابتهالى واحدة
كنت اعرفها زمان
بس الله يسامح اللى خان

كانت هدية

وصاحبتها مشيت
خلاص مش قضية
نفس الدخان
ليه طعمه اتغير
وبقى فيه طعم اللبان
والدخان ليه مش بيبان
تدخينى فلسفة
وانا فيلسوف
مع كل سيجارة اسرح واطوف
والولاعة ياما شالتها طفوف
وعلب السجاير محطوطين على الرفوف
والسجاير فى العلبة
زى الجنود
مرصوصين
فى صفوف
وانت ليه يا قلبى
على الحب ملهوف؟
2
صاحى من النوم
على صوت
عارفه او معرفهوش
مش فارقة
كله فى الفاشوش
هى الساعة كام
مش عارف
مش هننزل بقى
لأ
انا خايف
هو انا ليه
غيرها مش شايف
شايفها جاية
متجملة باحمر شفايف
هى الساعة كام
بصيت للساعة
لسة بدرى
اه من عيونها
علمونى الفلسفة والشجاعة
اهلا بيكى يا محبوبتى
فى مملكتى
مملكة المتوحد
اللى كل عيوبه
انه بيحب بجد
اهلا بيكى فى قلبى
اللى سوره اتهد
اهلا بيكى فى مملكتى
انا
اللى قافش فى الدنيا
وواخدها فى حضنه
بالضبط
زى النخل
بيحضن ارضه
وانتى كل املى
فى بكره وبعده
احمد
طنطا
ابريل 2009