وصلت امبارح الغردقة، لحضور تدريب عن الصحافة المحلية ينظمه التعاون المصرى الالمانى ... الفندق الذى اقيم به هو فندق شتايجن برجر، وهو فندق المانى و اكثر نزلائه من الالمان . الحضور المصرى فى المنتجع قليل جدا..
بالامس وصلت حوالى الساعة التاسعة مساءا بعد اكتر من 8 ساعات سفر من طنطا للغردقة
وصلت الغرفة و اشتقت للاغانى بما ان الهيد فون عطلت وماسمعتش مزيكا من الصبح
فتحت اللاب توب واخرجت علبة السجائر و الفلاتر و قمت بعمل كوباية شاى وقعدت الف سجاير و عملت بلاى ليست للاغانى التى اريد ان العبها ... و بما ان الحنين كان جارف لمصر اللى مش شايفها فى الفندق هنا فاخترت العظيم مولانا الشيخ امام ، لعبت الشيخ امام انا اتوب عن حبك انا، و سألت نفسى وانا بحلق مع مزيكا امام و صوته يا ترى اتلعب الشيخ امام و اغانيه هنا فى الاوضة دى فى الفندق الخمس نجوم ؟؟
يا ترى جدران الاوضة سمعت صوت امام قبل كده ؟؟؟ طيب هى حاسه بايه ؟؟
طول عمرى مؤمن ان الجدران بتحس بالمزيكا .. بتستمتع بها و بتحب حاجات و مش بتحب حاجات، بحس ان الاوضة بتاخد نفسها و بتوسع لما بشغل تراكات معينة و بحس بها مقفولة على نفسها فى وقت لعب تراكات تانية ..
سبت امام يقول و يعيد "أنا أتوب عن حبك أنا "و ييجى عبد الوهاب و يقول "جفنه علم الغزل " و حسيت بالاوضة بتوسع سيكا سيكا و انا حاسس ان الاوضة وجدرانها فرحانيين باللى شغال
الغردقة
