فيلسوف سكر

يوم الخميس بالليل
فى البر اياه
ايوة اللى فى ارض النخيل
كاس ورا كاس
اسكر واميل
وبعد5 كاس
ابقى عليل
وافوق على ثولة
اصحى يا سكير
لا انا مش سكران
بالعكس
ده انا فيقان
وقلبى مليان احزان
من حببيتى اللى سايبانى
اللى سابتنى فى عز الازمة
وراحت معاها ايام اللمة
اهلا بيكم فى كراكيب
كوكبى الصغير الحبيب
كوكب المتوحد ابو
17 عام
انا مين؟
وانتى مين؟
انا وانتى روحين سوا
دابوا
زى قطرة فودكا مع 3 نبيذ
اختلطوا فى كاس
ساعة لما شربتهم
اه من ده احساس
احساس بانى طاير
فوق بحر خماير
وشايف حبيبى شايل
احلامى وماشى
بيستعد للرحيل
وانا لسة فايق من سكرى اللى دام كتير

2
اه من الليل
ساعة لما يدهن السما سواد
والله احساس غريب
يستحق الوقوف
ساعة ما تصحى
تلاقيك مقروف
زى اللى على كاس ملهوف
ولع سيجارة
ما فيش ولاعة
ولا كبريت
ولعها من قلبى المحروق بنار الفراق
وحبال الهوى المتقطعة
وكسر الاشواق
ليه كل وردة فيها شوك
بتنغرس فى ايد اللى يطبطب
ليه انا ماشى
ومش عارف رايح فين
هو انا مين؟
افتح يا صاحبى يا امين
مين؟
مش عارف
طب مش فاتح
خلاص هقول
انا واحد كنت ماشى
لاقيت حبيب
وقلب جديد
فرحت واتنططت
وبعد ما عشت
لاقيته قديم
ومعمول له اعادة تاهيل
زى حكاوى الزمن المعادة
وجراح قلبى العليل
احمد
طنطا

يونيو 2009

الفيزى فيزا فا فيزيا

قاعد انا فى حصه الماده الرخمه اللى اسمها ........................ واللى بيدى الدرس_مش هقول راجل ولا ست _عمال بيقول حاجات انا مش فاهم منها حاجه خالص والناس قاعده فاتحه بقها وبتنام ومحدش فاهم اى حاتجه فى اى حاجه والعمليه بايظه خالص وانا لوحدى فى عالم تانى عالم زى واحد اعمى فى سينما ما بتعرضش غير افلام صامته
والوقت يمر والحصه بنت ال..................... مش راضيه تخلص ما هى 3 ساعات وانا مخى بقى مهلبيه من كتر الحاجات اللى بحاول جاهدا انى افهمها لحد ما صحيت على كلام خلانى كنت عايز اعمل زى منتظر الزيدى واقلع اللى فى رجلى وادى بيه اللى واقف بيدى الدرس ومش هوه بس لا ده وزاره التربيه والتعليم كلها نفر نفر _الا حسام صاحبى_قال ايه بقى حاجه مش فى الكتاب ابن ال.............. اللى اسمه كتاب المدرسه والللى مفروض نلتزم بالمنهج الللى فى امه والحاجه دى بتيجى فى الامتحان لا والانيل ان الحاجه دى مش هتنفع تتشرح لانها اعلى من مستوى تفكيرنا وذكائنا والناس اصلا مش فاهمه اى حاجه دول كانتوا نايمين اه واللله الللى قاعد بيتفرج على اى حاجه فى الموبايل واللى قاعد بيسمع اغانى من على ال i pod واللى قاعد بيلعب xo واللى نايم وانا قاعد بكتب الموضوع اللى سيادتك بتقراه دلوقتى
طبعا انت لاحظت انى ما ذكرتش اسم المادة ودى هى المسابقه اللى انا عملتها
كل الللى عليك انك تحزر وتفزر وتخمن ايه هى الماده دى
وخلينى اقولك ان الماده دى الامتحان بتاعها جه صعب السنه الللى فاتت وناس انتحرت بسببها وناس دعت على الوزير
وحروف اسم الماده 8 حروف
ها عرفت؟؟؟

10 مارس 2009

أحيانا

احيانا

الطفل اللى جوايا بيصحى 

ويقول لى انا موجود

اسمع صوته بيهمس لى 

للجد وللبيزنس حدود

أمسك ورقى واقلامى 

ارسم 

واشخبط بالالوان

اطلع من صورة دنيا 

متلونة بلون بهتان

ارسم واشخبط ع الجدران

  وفى كل مكان 

 اغنى وصوت غنايا 

يسمع الناس فى كل الوديان

ارسم بلياتشو حزين 

وشه متلون بدهان 

او حتى واحد زهقان

ارسم فى السما طايرة 

عصفورة 

وبنت بتجرى والهوا يرفع التنورة

واغنى للعنكبوت النونو

وأعد على صوابعى من تانى 

ويسألونى 

القلم ده ايه لونه؟؟

ارسم ولد صغير 

فى ايده ماسك بلونة 

وعلى خده بوسة حنونة 

ارسم بنت بتجرى هنا وهناك

قتل البراءة للانسانية انتهاك

وافوق وافتكر انى كبرت 

وشبر ونص لفوق طولت 

وبقيت راجل كبير 

وللجد والبيزنس اسير 

اكتوبر 2010

انشر هذه الابيات احتفالا بانى لقيت اجنده من سنة 2000 كنت بكتب فيها يومياتى وبرسم فيها 

كنت عيل عندى 8 سنين وبرسم اى صور واكتب اى كلام 

عشر سنين عدوا 

ولسه

فلسفة عداد اشارة المرور

فلسفة عداد اشارة المرور

سرحت فى عداد اشارة المرور . فى الارقام اللى بتعد تنازلى 45 44 43 42 41 40 ..........................
سرحت فيها اتخيلت ان ده عداد عمرى وان الارقام دى هى رصيدى من الايام اللى ليا علشان اعيشها على ارض العالم ده وكل يوم بينقص من الايام دى يوم لحد ما يتصفر العداد .
خلصت الاعداد ال 45 فى العداد واتصفر عداد اشاره المرور واتحول لون الاشاره الى اللون الاخضر .
اتحركت العربيه تمشى بعد توقف .
اتخليت ان انا العربيه دى وفى يوم من الايام يوم لما يتصفر عداد رصيدى من الايام الارضيه هتنور الاشاره اخضر فاتحرك ماشى .
ماشى رايح مكان بعيد اسيب الكوكب ده واروح لحته بعيده .بعيد جدا عن العالم ده .
بس لازم اسيب حاجه فى الكوكب ده تعرف اللى هيجى بعدى ان كان فيه حد هنا عاش اسمه احمد
لازم اسيب حاجه تاكد انى عشت واتعلمت على ارض الكوكب ده
اتعلمت من حاجات حصلت وبتحصل اتعلمت من فلسفه الحياه عليه
واتعلمت ان فيه ناس بتعيش وتموت وترحل عننا سواء لا فيه حاجه تفكرنا بيهم ولا حتى احنا نعرفهم
قررت انى ما كونش من الناس دول
واسيب بصمه على ارض العالم ده قبل الرحيل
قبل ما تدق اجراس موت واحد من العباد
قبل ما الاشاره تنور اخضر واسيب الكوكب ده
لازم يكون ليا رساله فى الايام اللى بعيشها
هى دى فلسفه عداد اشاره المرور

فى الاتوبيس
طنطا فى 16 يناير 2009

يبنى نصبه التذكارى

يبنى نصبه التذكارى
بأحجار لونها
احمر نارى
استعدادا للرحيل
كى يتبقى له
ما هو اكثر من
العويل
يأمل ذكر اسمه
بعد الموت
عند السكوت
هذا صرحه المشوه
بخطايا الزمان
وهذا قلبه المخضب
بمعانى الحنان
هنا كان يعيش
وهنا تأمل
وهنا امام مرأته
كان يتجمل
هذه صورته
وهذا كتابه
تركه ليكون عبرة للعابرين
لمن هم فى عمر شبابه
عاش قليل
وتعلم اكثر
حياتهم طوال
وحياته اقصر
هذا انا
وهذا نصبى التذكارى
احمد
طنطا فى 13 مايو 2009

هى الساعة كام ؟؟؟

هى الساعة كام؟
مش عارف
بصيت للساعة
ياه دا انا اتاخرت
شديت الهدوم من ع الشماعة
بنطلون وحزام وتى شيرت
وادى كمان سيجارة لزوم الاصطباحة
فين الولاعة
اهى
ادينى ولعتها
بولاعة فضة
عليها حروف اسمى بالذهب
جابتهالى واحدة
كنت اعرفها زمان
بس الله يسامح اللى خان

كانت هدية

وصاحبتها مشيت
خلاص مش قضية
نفس الدخان
ليه طعمه اتغير
وبقى فيه طعم اللبان
والدخان ليه مش بيبان
تدخينى فلسفة
وانا فيلسوف
مع كل سيجارة اسرح واطوف
والولاعة ياما شالتها طفوف
وعلب السجاير محطوطين على الرفوف
والسجاير فى العلبة
زى الجنود
مرصوصين
فى صفوف
وانت ليه يا قلبى
على الحب ملهوف؟
2
صاحى من النوم
على صوت
عارفه او معرفهوش
مش فارقة
كله فى الفاشوش
هى الساعة كام
مش عارف
مش هننزل بقى
لأ
انا خايف
هو انا ليه
غيرها مش شايف
شايفها جاية
متجملة باحمر شفايف
هى الساعة كام
بصيت للساعة
لسة بدرى
اه من عيونها
علمونى الفلسفة والشجاعة
اهلا بيكى يا محبوبتى
فى مملكتى
مملكة المتوحد
اللى كل عيوبه
انه بيحب بجد
اهلا بيكى فى قلبى
اللى سوره اتهد
اهلا بيكى فى مملكتى
انا
اللى قافش فى الدنيا
وواخدها فى حضنه
بالضبط
زى النخل
بيحضن ارضه
وانتى كل املى
فى بكره وبعده
احمد
طنطا
ابريل 2009